الثلاثاء، ٨ فبراير ٢٠١١

يرحل يعني يمشي يمكن ما بيفهمشي


بصراحة انا ما شفتش في حياتي بجاحة اكتر من بجاحة المخلوع ابن مبارك الغير مبارك الملعون في كل كتاب

ملايين الملايين كل يوم تخرج وتطالب انه يغور في داهيه وهو عامل نفسه عبيط والا يمكن بيستعبط فاكر ان المصريين الي فاقوا من الغيبوبه الي كان معيشهم فيها لسه نايمين في الهم اصل عمره ما نيمنا في العسل فاكر انه لما يعين عمر سليمان او يغير الحكومة انه حيضحك علي عقول الناس هو فاكر ان المصريين خلاص من اكل المسرطن وشرب ميه المجاري بقوا خلاص من غير عقول ما يعرفوش ان اصغر عيل في مصر انصح من عشره زيه

فاكر اننا مش فاهمين ان عمر سليمان ماهو الا وجه اخر عكر زي وشه وان احمد شفيق ما هو الا واحد من شله الحشاكيل الي حواليه الحرامية بتوع الوزارة الي خلت الناس تبيع نفسها لو هو راجل نضيف زي ما بيقولوا ايه الي كان مخليه موجود في وزارة فاسدة ومنيله بستين هباب

اول ما الباشا قعد علي الكرسي اعلن بمنتهي البجاحة ان الحكومة هي حكومة حزب وطني يعني الطينه من العجينة فين بقا التغيير مهو واحد من العصابة الي نهبت البلد ومصت دم الغلبان الي ماحلتهوش حاجه

وعمر سليمان ماهو كمان واحد كان من المتوقع ان لو الشعب ما وافقش علي جمال بالجزمة كان حيجي سليمان انا مش فاهمة الراجل ده جنس جبلته ايه

واشمعني الوزراء الي خرجوا من الوزارة هما بس الي بيتحولوا للنيابة العامة ماهو تلات اربع الوزارة السابقة لسه موجودة عايزين يقولوا ان شفيق نضف الوزارة من العناصر الفاسدة واشمعني النائب العام ماجبش سيرة نظيف الي نضف حياة المصريين من كل حاجة حلوة حتي الرغيف الحاف بقا من الاحلام الحصول عليه ربنا ينتقم منهم كلهم ويوري الغلابه فيهم يوم قول شهر

احسن حاجة حصلت بقا اننا شوفنا دم جديد وروح جديدة سمعنا الشباب المصري وهو بيتكلم ادب وعلم وثقافه ووعي الناس قاعده في الميدان عايشين المدينة الفاضله بيقوموا بنضافة المكان والي يمسكوه من بلطجيه النظام بيخرب او بيسرق اي حاجه يمسكوه ويسلموه للجيش هي ديه مصر الحقيقية

ياعالم تعالي شوف مصر مش الزبالة والاهمال واطفال الشوارع لا مصرهي الثورة مصر هي التظاهرات السلمية مصر هي الحرية الي حياخدها شباب مصر من بق الاسد

برافو عليكم يا شباب شباب المهجر الي اضطر للهجرة قصرا متضامن معاكم العالم كله بيشيد بادبكم واحترامكم وثقافتكم

وخلي الي يقول يقول اذا كان قالوا عليكم بتاخدوا ميه يورو في اليوم ووجبه كنتاكي ولا يهمكم اصل الحرامي فاكر كل الناس حرامية زيه

لو قالو عليكم عملاء ووخونة فالخاين والعميل الي عمل من ورا الغلابه مليارات المليارات لو قالو عليكم عملاء اسرائيل فهما باعوا ثروات مصر من اثار وبترول وغاز للعالم كله بتراب الفلوس وقبضوا بالدولار والشبكل ولو كده تقرير الزمة الماليه بيبين مين الي عنده المليارات ومين الي مش لاقي الرغيف الحافي

اه يا بلدي يا تكية يا وسيه

سرقوكي الحرامية

ليست هناك تعليقات: