السبت، ١٢ فبراير ٢٠١١

مبروك لشعب مصر


الف مبروك لكل مصري ومصرية مسيحي ومسلم متنصر ومتاسلم بهائي وقرأني او حتي معندكش اي ايمان

لما اتحدنا مع بعض حطمنا القيود وفكينا من الاسر وطردنا الشيطان من وسطينا

مصر حترجع تاني لكل المصريين مش لولاد ال بس

خلونا نحط دايما ايدينا في ايدين بعض نحب بعض لاننا مصريين

نختلف مع بعض اه لكن نكره بعض لا الي خلونا نكره بعض خلاص غاروا في ستين داهيه

نحترم بعض ونخاف علي بعض مش معقوله لما يكون اخويا زعلان انا حكون فرحانه

تحيه لكل الشهداء الي سالت دماهم علشان احنا نرفع راسنا

تحيه لكل الشباب الي اعتقلوا والي ناموا في الشارع اكتر من اسبوعين علشان احنا ننام في امان

تحيه لكل واحد حس بالمسؤليه ناحيه بلده وبيته ولما شاف اي حد بيكسر محل او يكسر اي حاجة وقف قدامه وقاله لا

تحيه لكل مصاب وكل واحد ساب بيته واولاده وتظاهر لغايه ما حصلنا علي الحرية

من النهاردة احنا اخوات وقادرين علي ادارة بلدنا وبخير بلدنا حنقدر اننا نكون احسن بلد

لما سمعت المليارات الي نهبوها رؤوس الفساد حسيت اننا بلد غنيه اوي مش محتاجه معونات من حد

ومحدش حيقولنا نعيش ازاي ونعمل نظام ديمقراطي ازاي احنا اول حضارة عرفها التاريخ

يلا بينا نفرز مننا كل ايد نضيفه ونرشحها علشان تبني البلد

بلا نعزل منا كل خبيث ونسامح بعض ونبدا صفحة جديدة لان النظام الجديد لازم يكون نظام شفاف نشوف فيه كل شيء بيحصل ونعرف كل شيء

الف مبروك لكل المصريين