عيد ميلاد مجيد

كل سنة وجميع المصريين بخير بمناسبة عيد الميلاد المجيد وتهنئة خاصة الي اخواننا الاقباط بمناسبة عيد الميلاد المجيد
هي ديه المقدمة الي سمعتها كتير النهاردة عند بداية كل برنامج وخصوصا برامج فترة الصبح من راديو مصراصل انا مدمنة راديو قعدت افكر واقول هل ديه اول مرة اسمع فيها الكلام ده والا سمعته كتير بس علشان كدب مكنتش بنتبه ليه اصل الصدق والحقيقية لها مصداقيه برضه

بعث السيد الرئيس محمد حسني مبارك ببرقية تهمئة الي قداسة البابا شنودة الثالث بابا الاسكندرية وبطريرك الكرازة المرقصية هنئه فيها والاخوة المسيحيين بمناسبة عيد الميلاد المجيد وقد ارسل السيد فولان الفلاني نائبا عنه لحضور صلاة قداس عيد الميلاد المجيد
يا سلام عليك يا ريس راجل ما بتفوتكش فوته عارف اعياد الاقباط ودايما حاضر بمندوبيك وتحت ايدك مكنة تلغراف ترسل منها اول ما تعرف بس الغريب ان الريس ما بيعرفش ان فيه مسيحيين في مصر الا مرتين في السنة وان المسيحيين دول مصريين ويجب احترامهم وتقديم التهاني ليهم ولما بيقدم التهاني هو بيحس انه راضي وان الاقباط واخدين حقهم وزيادة من برقيات الريس واهتمام الريس
بس يا ريس فيه مناسبات كتير انت نسيت تبعت فيها برقيات للاقباط مثلا
لما اتقتل الاقباط علي يد مسلمين في الكشح نسيت تبعت برقيه
لما دخل المسلمين كنيسة مارجرجس في ابوقرقاص في المنيا وقتلوا الناس الي بيصلوا نسيت تبعت برقيه
لما المسلمين هاجموا كنائس الاسكندرية وقتلوا عم نصحي وحاولوا يقتلوا تاصوني والمحلات والعربيات الي اتحرقت للمسيحيين وكل اسبوع لما واحد مختل عقليا يدخل كنيسة بسلاح ويجرح المصلين يوم الاحد نسيت تبعت برقيه
واحنا ليه حنفتكر الحاجات القديمة ديه خلينا بس في السنة الي فاتت
لما المسلمين في العياط اعتدوا علي المسيحيين وولعوا في بيوتهمكل ده علشان كانوا بيدوروا علي مكان يصلوا فيه والصلح المخزي الي اتفرض علي المسيحيين ومفيش ولا تعويض عن خسائرهم نسيت تبعت برقيه
لما المسيحيين خسروا ملايين بعد ما المسلمين خربوا محلات ومتاجر المسيحيين في اسنا كل ده بسبب واحدة مسلمة حرامية بتتخفي في النقاب برضه يا ريس فاتت عليك انك تبعت برقيه
كل الامثله ديه علي سبيل المثال لا الحصر ناهيك عن الاضطهاد الي كل يوم بيشوفه المسيحيين في الشارع والشغل والسكن وحتي في احلامهم مضطهدين

وبعث السيد الرئيس ببرقية تهنئة الي ابنائه المسيحيين في المهجر يهنئهم بعيد الميلاد المجيد
يا سلام علي حنية وطيبة قلبك يا ريس طبعا يصعب عليك ان الاقباط الي سابوا لك الجمل بما حمل انهم يقضوا العيد من غير مانت تعيد عليهم مش اقباط المهجر دول الموصوفين بالخونة والعملاء
انت فاكر انك تهنئتك ديه حتعمل حاجة لاسرة او شخص ترك بلد غصب عنه لانه ملقاش له مكان فيها
انت فاكر ان العيد بعيد عن الاهل والاصدقاء والكنيسة في مصر ده يبقا عيد
بس حقولك حاجة كان فيه واحد عنده مللك اكتر منك بكتير تقريبا مكانش فيه واحد في الارض كلها زيه لانه عاند الاله الحي بكلمة واحدة من الله سقط ملكه واتغرب في الارض وبقا الندا يبل جسمه زي اي حيوان الملك ده هو نبوخذ نصر لغايه ما رفع عينه للسما وعرف ان الله لا يشمخ عليه

والغريبة ان الريس وهو بيكتب البرقيه مخافش ان الورق يبقا عليه دم الاقباط الي بينزف من ايديه
وكل سنة وانت طيب يا ريس